Café concerto 25 de xullo, a partir das 18 horas.

Mvundi

Alberto Mvundi é compositor e músico angolano, afincado en Galiza desde hai anos. Os seus ritmos están marcados polas raíces africanas, con cancións tradicionais que lembran o seu país natal misturadas con músicas actuais.

Os John Deeres

Os John Deeres levan 15 anos facendo hard rock en galego. O grupo estradense, composto na parte instrumental por Xermán, José, Marcos e Reices, acaba de completar a formación coa fichaxe de Vane á voz. Logo de publicar “8” (2013) e “20-20” (Free Code Jazz, 2017), Os John Deeres editan, en plena pandemia, “Cinzas”, un EP gravado no local de ensaio con distintas colaboracións e con portada do tamén estradense Alberto Cardona. “Cinzas” son catro temas reciclados a partir de ideas antigas que significan unha continuidade entre o pasado e o futuro da banda, un punto e seguido para continuar con novos proxectos.

Berto

BERTO é a metade de Verto, así de sinxelo. En decembro de 2021 publicou o seu primeiro traballo en solitario, “Viaxe ao espazo interior” e en marzo de 2022 sorprendeunos cun novo E.P “Bailar Chikito”. Unha mestura orgánica entre o pop, a música electrónica, o trap e o techno. O novo proxecto de BERTO vai acompañado cunha banda en directo, mesturando o analóxico e o dixital.

DJ Ferromona

O proxecto Ferromona picadiscos nace no 2017, froito dos milleiros de temas musicais que lle rodan a Luzía Álvarez pola cabeza e da necesidade de máis cor lilá no mundo. A Ferromona bota a andar por tabernas e centros sociais do País e continúa por festivais coma o Antrospinos, o Revenidas ou o “Berra em galego”.Un ritual de máscaras e bananas. A fusión dun núcleo metálico e tropical que estoura en palabras de orde: feminismo, raíz, e contundencia; unha música chama pola outra e non hai tímpano ou corpo que o resista.

A %d blogueros les gusta esto: