Bratzantifa son as gañadoras do concurso Novos Valores 2022
O xuri valorou as letras populares, comprometidas, con críticas á situacion sociolaboral pero sen deixar de lado o humor e a ironía, chegando ao poético desde o cotián
O xurado do VI Concurso Novos Valores 2022 elixiu como banda gañadora o dúo Bratzantifa, conformado por Marina González e Lucía Amado, que serán as encargadas de abrir a edición do Festigal 2022 na noite do 24 de xullo.
En total, foron 14 os traballos que se presentaron a esta edición, máis dunha ducia de bandas de todo o país e de todos os estilos que fan música en galego, o que dá mostra da efervescencia e da proliferación de artistas que buscan impulso para a súa proxección en Galiza.
Braztantifa nace no confinamento de 2020, ao crear música na cociña das súas casas e entre conversas coas amizades. Fan música urbanas e bedroom pop, estilo que mesturan con letras punk, conservando a súa vulnerabilidade. Elas mesmas defínense como unhas hooligans do brandiño e da tenrura radical. Nestes dous anos de traxectoria deron dous concertos en Santiago de Compostela, un na Sala Casablanca e outro na Tenda Kamaleón Vintage.
O xuri valorou as letras populares, comprometidas, con críticas á situacion sociolaboral pero sen deixar de lado o humor e a ironía, chegando ao poético desde o cotián. Ademais, consideraron que se trata dunha proposta que segue a liña das tendencias musicais actuais.
O xurado estivo integrado pola rexente da sala de concertos Malatesta, Catuxa Irago, o músico Marcos Paino, o integrante de De Ninghures Manuel Fernández, a voz de Arrythmia Alberto Busto, a actriz Neves Rodríguez e o músico Anxo de Xermar. Completaron a composición do xurado Alberte García e Marta Gómez, por Galiza Nova, e Lucía Veciño, en representación da Fundación Galiza Sempre.
Este concurso pretende continuar a ser unha plataforma de coñecemento e difusión de artistas emerxentes que fan música en galego. O escenario do Festigal estará aberto un ano máis a todos os estilos musicais que apostan pola nosa lingua sen complexos, agardando que esta edición en que se fan 20 anos do evento sexa un grande acontecemento social.
